Alter Orient

Dr Begriff Alte Oriänt bezäichnet dr geografisch und zitlig Ruum, wo vo dr vorderasiatische Archeologii und dr Altorientalistik erforscht wärde, und d Kulture, wo in däm Ruum entstande si, bsundrigs d Hoochkulture. En äihäitligi Definizioon vom Ruum und vo dr Zitspanne vom Alte Oriänt existiert nit. Sini Kärngebiet umfasse Mesopotamie und sini Noochbere, dr Iran, Anatolie und d Levante.

Noch em geegewärtige Forschigsstand het d Menschhäit im Alte Oriänt meereri Entwiggligsschritt früener as in jeder andere Region vo dr Wält gmacht. Doodrzue ghööre bsundrigs d Neolithisierig, d Urbanisierig und d Entwigglig vo dr Schrift, wo dr Übergang vo dr Prehistorie zur Gschicht markiert.

Im Alte Oriänt höi sich im Lauf vo de Joorduusige meereri Hoochkulture usbildet. Vo dene si d Sumerer, d Babylonier, d Assyrer, d Hethiter und d Perser bsundrigs berüemt worde. Die letschti altorientalischi Hoochkultur, die vo de Sassanide, isch mit dr Usdeenig vom Islam undergange, was e nöiji kulturelli Faase in däm Ruum markiert.